Passasti, giuvintù comu lu ventu,
ti nn'isti e nun c'è spiranza di turnari,
mi lu facisti a mia 'stu trarimentu,
e vecchiu mi facisti addivintari.
Cci penzu e cu mia stessu mi lamentu,
picchì nun mi pò nuddu cunsulari,
ora chi sugnu comu lu furmentu,
quannu s'insacca e si va a macinari.
La gioia chi mi rasti mi rammentu,
su' ormai luntanu 'sti ricordi rari,
vulissi stari tranquillu e cuntentu,
finu chi Diu m'accorda di campari.
Ma 'nta lu cori meu 'na pena sentu,
chi mi turmenta e nun mi fa ripusari,
la notti m'arruspigghiu e pensu a tia,
ma tu nun torni chiù giuvintù mia.
Mentri caminu e sugnu pi la via,
fazzu jurnati sani di pinsari,
e campu cu la testa 'infirnicia,
chi picciottu nun pozzu cchiù turnari.
E la mè stessa 'ucca dici a mia:
picchì 'un ti rassegni e ti pripari?
La vita è 'na rota chi firria,
si nasci e mori e n'amu a cunurtari.
La morti 'un viri vecchi e picciutteddi,
veni e si pigghia ricchi e puvureddi.
Fontana Antonino
