Jnnaru, scilliratu e malirittu,
traggiriaturi di la casa mia,
cunsumari mi voi la massaria.
Senza nudda ragiuni né dirittu,
tutti 'sti cosi vinniru cu tia,
lu lassu a tistamentu a tutti scrittu,
tu sì lu misi di la rivirsia.
E nun ti nni curi s'a li puvireddi
cci morinu li pecuri e l'agneddi.
Cumpassioni nunn'ai pi 'st'armaleddi,
sciusci spissu punenti e tramuntana,
e, puru avennu la lana e la peddi,
lu friddu forti 'nta l'ossa trapana.
A niatri picurara puvireddi
ni passanu li jorna e la simana
a stari fora cu li 'ncirateddi,
mentri li ricchi dintra la so tana
stannu beddi tranquilli ammantiddati
e niatri semu fora e disprizzati.
Tu ti diverti a fari nivicati
e 'nta la terra erva nun nni crisci,
cu l'acqua, cu lu friddu e li ilati
lu siminatu ch'è natu spirisci.
Li debbiti vonnu essiri pacati
e 'un sapemu comu ni finisci,
mentri li ricchi dintra arripusati,
su cu li panzi chini grassi e lisci.
E niavutri afflitti puvireddi
semu fora a lu friddi aggragnateddi.
FONTANA ANTONINO
Nessun commento:
Posta un commento