Ô SPECCIU

Ogni gh-jiuornu m’addummannu:

cchi cci fazzu nta stu munnu?...

Fazzu bbeni… fazzu ddannu…

A cchi ssierbu?... Cchi è ca sugnu?

Stu pinzieru vi lu ricu

nu mmi lassa rripusari:

mi taliu ô specciu e ddicu:

- Rimmi tu com’è cà ffari! –

Chiddu rriri, mi talia…

- Cchi ti mporta? - m’arrispunni.

Ppuoi la testa nnaculia

e mmi fa: - Cchi ti cunfunni?...

E sse ffazzu com’a ttia

e tti fazzu ssa ddummanna?...

- Lassa peddri sient’a mmia! -

E ssi vota ri dda bbanna.

A stu puntu sai cchi ffazzu

prima ca cci niesciu pazzu:

arrunciu i spaddi, lu taliu…

e la testa nnaculiu.


GIUSEPPE D'AVOLA