BUONA PASQUA

CHISSU E' SALEMI

Dunni viditi  muntagni di issu

chissù è Salemi, si passati arrassu

lu granni onuri a vui non è pirmissu

di godivi contanti tantu spassu

di musica, alliria, cantari spissu,

la petra campanedda ad ogni passu,

e sfinci e cassateddi e un sulu chissu

fritti 'nta l'ogghiu nostri senza rassu,

di pani a San Giuseppe un veru abissu

u Casteddu talia di supra un massu

cu Polisu e Mukarta sempre fissu

la storia e l'arti nostra passu passu,

Nicola, a Maculata, u Crucifissu

li megghiu Santi chi purtamu a spassu!

Anonimo

"NCARCIRI MA NUCCENTI

Un omu chi cacciari ci piacia,

avia un cani di caccia nutricatu

a attaccatu sempri lu tinia

pi evitari d'avillu arrubbatu.

Dd'armaleddu carizzi ci facia

essennu a lu patruni affeziunatu

pani e pasta mancari 'un ci facia

ma di la libertà l'avia privatu.

Comu ssu cani ci nni su' 'nnuccenti

chi su' 'ngalera senza fari nenti.

FONTANA ANTONINO

QUANTU COSI HAIU VISTU !

Haiu vistu pisci risaliri ciumi,

haiu vistu l'acqua addivintari fangu,

lu pani petra e li faleni lumi,

abballari mazurchi comu tangu,

diri ch'è bonu lu fetu di  biccumi,

mettiri in galera òmini di rangu,

viniri a galla strunza e picurumi,

accattuni, balordi e suca-sangu....

Ma chiddu ca 'un aveva ancora vistu,

nta stu munnazzu chinu di cuntrasti,

è chiddu ca nta stu mumentu assistu:

'nmezzu a buttani, porci e pederasti,

d'unni mi votu e giru e terra pistu,

pigghiaru forza e sopravventu i  crasti!

PIPPO  NASCA

LA SOGGIRA

Quannu la sturiella liggivu, o Petru,

di lu triplici cantu di lu jaddu,

pinsannu d'applicari giustu metru,

ti giudicai pi  'vveru 'n-beddu taddu.

D'un santu impusturi visti lu spettru,
ma stu pinzari fu sulu un azzardu.
Ora sacciu! E di dirlu nun arretru!
Si ti ni parru ancora nun è sbaddu.

Scusami davveru o petru santu!
Sulu lu paradisu a tutti l'uri
ci tocca a l'omu ca supporta tantu!

'Un importa si tradisti lu Signuri,
ca ti bastò pruvari sulu scantu
di sentiri di soggira l'oduri.

Pippo Nasca