LA SICILIA
Quannu ebbi fattu u pataternu u munnu
Stancu n'Sicilia si lassò cascari
La terra ci ciurio tutt'attornu
E l'aceddi si misiru a cantari.
Dissi: cca vogghiu mettiri lu tronu ,
Ca vogghiu ripusari a la stagiuni;
E comu Muncibeddu e u re di li munti
Sia chista la rigina di la terra!
Il dogma della verginità di Maria
Pigghia lu cchiù gran specchiu chi cci sia,
Sia di finu cristallu o sia 'na massa;
Tu guardi a Iddu, iddu guarda a tia,
Vidi ca l'umbra, dintra passa;
Tu t'alluntani, cancia iddu la via;
Lu specchiu Senza macula si lassa;
'Ccussì fu Cristu' n ventri di Maria;
ncarna ', nasci, e vergini la lassa.
Borgetto (Raccolta Pitrè)
LA TIRANNIA
La tirannia li carcagni 'ncarca,
l'abusu e lu putiri strica e curca;
Ogni nazioni ch'a sta terra sbarca,
si diverti cu nui sempri a la turca;
Sempri lu circu 'n frunti 'nni rincarca;
A viviri nni tocca amara urca;
E s'accussì nni sècuita la varca,
megghiu ca ni nni jissimu a la furca!
Raccolta Pitrè
PERI D'ARANCIA
Peri d'arancia comu ti pirdisti,
E ti pirdisti pi li cunsigghieri,
Eri tu duci e amara addivintasti,
Chi ti mancau l'acqua di lu pedi?
Eri tu funtanedda d'acqua frisca,
Ca ci vivianu Conti e Cavaleri,
Ora ciumi currenti addivintasti,
Cu passa e spassa si ccì lava li pedi.
Anonimo
La merla
Un tempu amai ‘na merla ammaistrata,
la vulia beni chiù di l’arma mia;
La tinia ‘nta ‘na cammara firmata,
cu li me’propri manu la pascìa.
Vinni lu tempu!.... Sta merla ammaestrata
Lu cantu di nautru aceddu ci piaciu;
Passau lu cuccu e fici la chiamata;
Si nn’ju cu lu cuccu e lassau a mia!
Cefalù Raccolta Pitrè
LA SAGRA FAMIGLIA
Mariuzza lavava,
Giuseppi stinnia,
Gesù si stricava,
ca minna vulia.
Zittuti figghiu,
ca ora ti pigghiu,
ti dugnu la minna,
ca pappa un’ci n’è.
Avola
Giuvini schiettu, cardiddu d'amuri,
Zoccu t'haju prumisu t'haju a dari;
T'haju prumisu un jancu muccaturi,
D'oru ti lu cummienzu a raccamari;
D'accantu accantu ci scrivu l'amuri;
E 'nta lu miezzu un'acula riali,
E poi lu stennu 'mmiezzu rosi e sciuri:
- 'Sciucati prestu, cà t'haju a mannari.
Mineo ( Raccolta Pitrè)
