Ntò misi ri ghiugnettu
mori la paparina
ancìra lu spineddu
ancrana la racina.
U sciumi va ssiccannu
a surgiva è ccò llammicu....
Nta tutta la campagna
cunciunu li ficu!
La ficu i primi sciuri
manciata la matina
austusa è cciù rò cièvusu
cciù aruci rà rracia.
Però ti la manciari
cunciuta ò puntu ghiustu;
strazzata a vistinedda
e prima ri menz'Austu.
E mmancu ossa havi
stu fruttu sapurusu
à po' manciaru u vecciu
u ggiuvini e u carusu.
Ccu ddu cuccidd'ì meli
ca fila rò culiddu
cci scrama lu curuzzu
macari a'm-picciriddu!
Picch'ì la ficu è ffimmina
e quannu è castagnola
è comu a picciuttedda
c'ancora va a scola.
Quann'è c'appuoi spacca
tannu è ciù ssapurita
cà puoi paraunari
a fimmina quann'è zzita.
Scurciata appena còita
maravigghia ri Natura
è ccomu se spugghiassitu
'na bbillissima signura!
Passatu lu so' tiempu
rrimodda e gnacitisci:
ddiventa com'a veccia
c'arrappa e mpassulisci!
E tannu unn'è di còggiri
è proprio ri jittari
ca mancu l'auceddi
la vuonu pizzuliari!
Cc'è a ficu natalina
chidda sanciuvannara...
ma ri chidd'austunisa
si ni jinciunu panara!
Li poi siccar'ò suli
o farini mustata;
ncannati nta ru' scroppa
o masonna a mmarmmillata.
U zzuccuru cci quagghia
nta chiddi scauràti
s'ancòddunu ri meli
a rressi li nciappàti.
A Nnunviernuccu ddu 'miènnuli
quattru nuci e ddu rranata
fai li muorti a li niputi
ccu na bbella passulata!
Ma i ciacciari su' Cciacciari
sapiti cchi bbi ricu? ...
Mi ni vaju sutt'a maccia
e bba ccuogghiu quattru ficu!
tratta da : Vinu ri vutti veccia. di G. D'Avola
