Assissuri, tu chi si prudenti,
Ali spazzini nun ci fari mali,
Chista è l'epuca di lu fari nenti;
Dimmi cu reggi nta stu vintannali?
Ntall'Italia , du livanti a lu punenti,
Ci voli na rifurma ginirali,
Cu suli colpi di scupa e di munnizza
Sta friscu chi l'Italia nun s'addrizza.
Assissura e Diputati
Tennu registru e cuntrulluri
E emettinu li liggi
Tutti a so favuri.
In casu di discordia
Li sannu riparari
A rassu di li so natichi
E dunni cari cari.
Stu mè paisi malufinu e beddu,
Dicia la bonarma di me nannu,
A Vita, Salemi e Campubeddu,
Mentri li genti ianu passiannu,
Sintianu la vuci, du purteddu:
Levati di sutta chi ti mpannu!
E arrivavanu a frusciu, strati strati,
Munnizza e pisciazza accutturati.
Viriti ora si c'è cchiu fituri,
St'abbitudini divintaru rari,
Ficiru lu macellu, li fugnaturi,
Nun parlanu cchiù di trini d'annittari,
E nta stu Pacecu beddu comu un ciuri
Stannu sempri anziusi a aspittari,
Li sordi li spenninu a maluri,
Nun si capisci soccu vonnu fari.
Zapparu quasi tutta la custata,
Pi fari la fogna, larga e funnuta,
Di Canteddu a lu ciumi Baiata,
Pi a l'acqua niura darici la sciuta.
Zapparu santu Roccu, l'acchianata,
Ficiru e sficiru a la muta,
Comu la boria di na nivarrata
Sutta li coccia a cu s'aiuta aiuta.
Ristau na cosa morta e mpurvicata,
Ficiru un simplici canali,
Senza l'innestu di la palazzata
Pi rennilu cumpletu e funziunali.
Fù comu n'abortu di na gravidanza
Chi vinia lu munnu a ralligrari
La famigghia, china di spiranza,
Ma la fidi morsi prima di spuntari.
Serafino Culcasi
