PIRITEDDU

Tuttu lu munnu è paisi

e ogni paisi havi li so usi.

Chiddu miu, e nun è cosa 'nsolita,

porta a bannera pa la 'nnolita

ca sta vota fu cunjata

e 'ncapu 'n omu scarpiddiata.

Capita a un poviru cristu,

a 'na armuzza 'i priatoriu

pi lu quali lu campari

divintà un veru martoriu.

Facja u scarpareddu 'nna me' via

pistannusi li jta 'nna chiantedda,

ma rinnennu li scarpi murtaredda.

Matri natura cu iddu

nun fu di larga manu,

'nfatti, lu fici nanu:

le' gammuzzi si e no dù parmi,

torti pi junta

e mancu tanti fermi.

'na facci arripudduta di l'affanni,

unni la nasca era la sula cosa granni.

Ora, comu vuliti ca lu putissimu chiamari

n'antri carusi cu lu mangiascinu,

sta muddichedda d'omu curtu e minghirlinu?

Piriteddu!

E Piriteddu era di la matina alla sira:

-Ti salutu Piritè!

-Piritè, comu jemu?

E poi d'arrassu:

-Piritè .... pprrrrrrrr....

Dunqui nun era cosa di 'na vota

o chi capitava pi cumminazioni!

A jttalia 'nterra,

almenu tri  voti a lu jornu

c'era pi Piriteddu a so razzioni.

E Piriteddu:

-Porcu di cca e di dda,

sangu di Giuda,

ma nun' aviti chiffari,

ju lu pani m'haju a vuscari!

Certi jurnati 'mmeci era cchiu firoci

e allura:

- A tia t'haju a  mircari!

Oppuru vanniannu cu tutta la so ambascia:

- A tia t'haju a sminnari

figliu 'i bagascia!

Ma nun facja nenti di quantu prumittja,
li manu sempri 'nna chiantedda li tinja!
Mancu la notti avja rrizzettu,
picchì mentri ca iddu puntigliusu
martiddiava 'ncapu la sola
nautri, trasennu di lu retru
ci attaccavamu li linzola.
'Na sira ca turnavamu di trippiari,
nni vinni 'ntesta ca una grossa cci l'aviamu fari.
Quasi all'iniziu di la via
tecchia cchiù sutta di l'aciddaru
c'era Neri u ciuraru
ca cumminava mazzetti pi li ziti,
ghirlandi pi li santi
e curuni a li difunti.
Lu tularu di na nuda curuna ni carriammu
e comu si fa quannu c'è dintra u murticeddu
darrè la porta l'appizzammu di Piriteddu.
lu 'nnumani, di prima matina,
nni parsi duvirusu jri a taljari,
assicurarini cu gran primura
di l'effettu ca avja fattu a jttatura!
Ma quannu arrivammu davanti a lu purtuni,
Chiusu lu truvammu, cu supra un cartilluni
scrittu cu lu jtu
'nna pici ammugliatu,
unni c'era misu:
Chiusu, pi fini di l'attività,
Piriteddu nun sta cchiù ccà.
Esther Ciulla