CU 'CCI L'ATTACCA 'A CAMPANEDDA O' ATTU

Un 'attu chi di pilu era siamisi

stava jurnati cu li corna tisi

vigilannu si sguttava 'u pastu

e di li surci 'un si viria lu rastu.

Si coccarunu anticchia temerariu

s'avventurava, macari fora orariu

lu 'attu lu puntava e 'nt'òn mumentu

s'ù pulizziava senza fari stentu.

'Stu fattu e surci, li ficia iri 'n'deliriu

ogni nisciuta, finia sempri a martiriu

passaru parola, s'arribbillaru tutti

'i surci cagnoli, e 'i surci ri cunnutti.

Picca passau chi foru cunvucati

'nt'òn cunnuttu, 'mmenzu li pinnati

e o' jornu stabilitu tutti quanti

ventu rarreri e acqua di ravanti.

Ognunu purtava lu giustu rimediu

pi fari finiri 'stu perenni assediu

'na soluzione cc'era d'attruvari

picchì, accussì, 'un si putia campari,

Ficiru un cunvegnu 'npompa magna

dunni ciascunu purtau la sò lagna

s'arraggiunau p'u gnornu e pi 'na notti

e 'un mancaru sciarri e mancu lotti.

a la fini di tanti longhi riscursioni

si tiraru li cchiù giusti cunclusioni

'n coddu alu 'attu cc'era d'attaccari

'na campanedda pi sentila sunari.

Giustu, rissiru tutti, bbonu .... bbonu

appena lu 'attu si movi fa lu sonu

un surciteddu si susiu ri scattu

rissi: "bbonu! Ma cu' cc'attacca 'a campanedda o' 'attu"

Vincenzo Adamo

UN AUGURIO DI BUON NATALE PER CONTINUARE SEMPRE A SPERARE! TANTI CARI AUGURI.

LU VINU

Lu vinu chi stà dintra li vutti,

Pigghia culuri e addiventa chiù forti;

Lu vinu è lu spassu di tutti,

Piaci a li scinziati e anchi a li dotti,

Piaci a chiddi longhi, a chiddi curti,

Piaci a li sciancati e anchi a li storti,

Piaci, signuri vi lu dicu a tutti,

Sin'anchi a li nostri nanni chi sù morti!

Lu vinu piaci a tutti quanti,

Conti, Baruna, Principi e Rignanti.

A Emanuele ch'era sua Maestà,

Lu vinu ci piacia, quantità,

nta la buttigghia e lu bucali

Ci appizzau lu stemma riali,

E pi rispettu da Regina 

Unn'affunciava nta la tina.

Tra Binitu e u Principinu,

Si gustaru un gran vintinu,

A tempu di scoddi  e babaluci,

Pi vint'anni sempri "Duci".

Barunati e la Contea

Sciugaru i stivi in Eritrea,

Picchì a ddi tempi a Monarchia

Stipi e vutti assai nn'avia.

De Gasperi, chiù riliggiusu,

Purtau lu vinu cchiù gustusu,

Arrivatu Di Nicola

S'asciugau a prima tinola.

Inaudi inveci, lu bicchireddu,

Si lu riggia cu vastuneddu.

Mentri Gronchi, ogni matina,

Ddui iritedda di na tina,

Poi chiamava lu Ministru

Picchì un viria cchiù lu rigistru.

Segni cchiù mudiratu,

Finiu n'Sardegna, stralunatu,

E cu rispettu e mudistia,

 Fici largu a ccu vinia.

Arrivatu Saragatti

S'asciugau tutti li vutti,

Longhi, curti, tunni e chiatti;

E s'iddu ancora cumannava

Puru a cannedda si sucava!

A lu Liuni nferucitu,

Ci tuccau viviri acitu

E la crinera di bellezza

La nfangau mezzu dda fezza;

Comu fu, comu vosi Diu,

Tagghiau la corda e scumpariu.

Vinu meu quantu si bbonu.

Tu ci reggi anima e tronu.

Lu Parrinu ca cannata,

Vivi supra a Missa cantata;

Metti acqua, lu vattia,

Lu Salistanu chi talia.

Vinu bbonu di palatu,

Tu stu munnu l'hai guidatu,

Ma chista gran Demograzia

Sta mpasturannu puru a ttìa.

Serafino Culcasi

LA VIGILIA DI LU VOTU

La vigilia di lu votu chi gran festa!

chi granni rivugghiu chi succeri!

nta tutti li paisi c'è tinpesta,

chiacchiari, spillacchi peri peri,

ni vennu  a rinchiri la testa

tutta, dillusioni e di pinseri,

pi lu nostru eccellenti votu dari

a lu spillacchiu chi tenta d'acchianari.

Si prisenta lu zu Cicciu ncumpagnia

dicennu: C'è n'amicu candidatu,

tu parla cu to patri, cu to zia,

ti raccumannu tuttu stu vicinatu;

Tu etta un sautu alla pirifiria,

prumettici a qualcuno ch'è spustatu

e a li maistreddi diccillu beddu tostu,:

Acchianannu l'amicu c'è lu postu!

L'amicu a lu zu Cicciu ci acchianau,

di mezzu di lu fangu si nni sciu,

'nta la manciatura s'abbrazzau,

sa passa bona ringraziannu a Diu.

Lu zu Cicciu  iu mPalermu e lu truvau

p'un favuri a un terzu chi sbattìu

l'amicu sciiu cu beddu spuntu

a lu zu Cicciu  nun ci detti cuntu.

Dopu cinc'anni si torna, in allegria,

cu li sacchetti ntipati beddi chini,

cu accatta palazzi a la pirifiria,

cu accatta tirreni, cu, villini,

cu si fici la bedda segheria,

cu sociu trasiu, a Montecatini:

E l'amici, cu lu zu Cicciu, lusingati

arristaru cu li natichi squarati.

Serafino Culcasi

LU SANTU VAGITU

Inta la notti ca vinni la stidda

dintra na 'rutta, a cchiù picciridda,

lu santu vaggitu si fici cantu

e pì la matri fu lu gran vantu.

.......

Macari l'angili cantavanu n'coru

pi festeggiari lu bambineddu d'oru.

........

'N'menzu a la pagghia stava l'nnucenti

senza sapiri ca li chiodi spurgenti

li so manuzzi avissiru tagghiatu

pi libirari lu munnu di lu piccatu.

Angela Ragusa