CADIA NA' STIZZA D'ACQUA

Cadia nà stizza d'acqua ad allammiccu

davanti lu palluri di la luna.

Nta lu silenziu lu sicchiu pinnia

supra lu puzzu, allatu a li limuna,

stancu di li scinnuti  e l'acchianati

talia ncelu, comu pi circari.

Gimia lu pernu e puru la catina

appisa all'arcu chi  paria d'argentu.

Li chiuppa attintavanu sigreti

tistiannu a li discursa di lu ventu

chi spittinava  rosi arraccicati

supra lu tettu vasciu di li casi.

Curcatu lu silenziu supra un ciuri

svigghiava nà nuttata di suspiri,

svigghiava nà nuttata di duluri

e larmi, persi  mmezzu a tanti spini.

Maria Favuzza

MAFIA MUDERNA

Chi sacrileggiu, chi forti ruvina,

povìra Nazioni Italiana!

C'è troppu aumintata servaggina,

fannu macellu di carni umana.

Quantu siquestri e morti ogni matina,

spissu sona pinusa la campana;

pinzatici vui Maria, Matri Divina,

quantu chi 'sta timpesta s'alluntana.

Dimograzia tu si la suprana,

partitu beddu di la libirtà

chissu è lu veru ventu tramuntana,

la liggi di Gesù felicità.

Però c'è lupa e tigri fora tana,

fannu dammaggiu 'ncampagni e 'ncittà

e stannu grassi cu la burduana

senza paura di l'autorità.

Perciò la cosa malamenti và,

chista è 'na varca c'un po gghiri avanti,

ci voli frenu senza pietà,

tenìrì sutta chiavi assi birbanti,

caminari giusta la riartà,

capiri quali sù latri e briganti;

assicunnu l'erruri chi si fà

la fucilazzioni sull'istanti !

Ci voli chissu pi tirari avanti,

senza partitu, 'un fari diffirenza;

nessunu aiutu mancu di li santi,

ognunu fari un mali poi ci penza.

Amici ascurtatura tutti quanti

chistu svolgi la mia diligenza;

scusatimi si parlu assai piccanti,

mi sentu affisu di la dilinquenza.

Nominu a Pizzulongu amaramenti:

fracillaru la mamma e dui nuzzenti !

Giuseppe Settimo Scuderi