Accusu i politici
d'oggi e d'aeri:
Crispi e compagni,
pridicatura da monarchia,
beccamorti e fallignami
ca nchiuvaru a Sicilia
viva nta cruci.
Accusu i Savoia,
i primi e l'ultimo
re e imperaturi,
fascista e talianu
ncurunatu di midagghi
scippati cu sangu
ndo cori di matri.
Un seculu di guerri,
un seculu di stragi:
c'è ossa di siciliani
vrudicati nte diserti,
nta nivi,
nto fangu di ciumi:
c'è sangu di sulfarara,
di zappatura,
di matri scheletri
e picciriddi sparati
nte chiazzi da Sicilia.
Non hanno vuci e gridanu
L'ammazzati du '93
chi petri nte sacchetti
e la fami nte panzi vacanti.
Non hannu vuci e gridanu
cu coddu sutta i pedi di baruna,
cu l'ossa sturtigghiati du travagghiu;
ca lingua i cani
e u ciatu e denti.
Tri ghiorna di macellu
di martirio e baccamorti
di lamenti e chiantu
nte casi di poviri.
Ci fu carni a bon prezzu
nta tavula di baruna;
a bon prezzu
pi sovrani di Roma;
a bon prezzu pi Crispi,
macillaru di corte;
e Lavriano
ginirali e sicariu
pagatu a ghiurnata.
L'avemu cca
Ancora cca
chi stissi facci
e u cori di sarvaggi
i scannapopulu;
ci liccanu i pedi,
ci dannu u votu,
l'ugnia pi scurciarini;
a corda pi nfurcarini;
a mazza e a ncunia
pi rumpirinni l'ossa.
L'avemu cca
ancora cca a mafia,
assittata nte vanchi d'imputati
a dittari liggi;
a scriviri sintenzi di morti
chi manu nsangati.
L'avemu cca
I compari da mafia
Chi manu puliti,
i firrara di chiavi fausi,
i spogghia artari cu a cruci nto pettu;
unni posano i pedi sicca l'erba,
sicca l'acqua
spuntanu spini e lacrimi pa Sicilia.
L'avemu cca
L'affamati du putiri;
l'affamati di carni cruda,
ca cridinu a Sicilia
un porcu scannatu
e ci spurpanu l'ossa.
Si si Sicilianu
isa u vrazzu,
grapi a manu:
cincu banneri russi,
cincu!
Adduma a pruvulera du cori!
Si si Sicilianu
fatti a vuci cannuni,
u pettu carru armatu,
i gammi cavaddi di mari:
annea i nimici da Sicilia!
L'avemu cca e cantanu
I risignoli ammaistrati
c'agghiuncinu lacrimi di nchiostru
e lacrimi da Sicilia,
e stornellanu u misereri
a gloria di patruna.
Cantanu odi o suli
o celu
o mari
a zagara,
e portanu a Sicilia ntronu
cu velu niuru
di mala maritata.
U fumu svampa
e ghettanu cinniri a palati,
incapaci d'impastari
i cori di siciliani
e farini unu a tri punti
tridici voti chiù granni da Sicilia.
A Sicilia non havi chiù nomi
nè casa e paisi;
havi i figghi sbattuti pu munnu
sputati comu cani,
vinnuti all'asta:
surdati disarmati
chi cummattinu cu i vrazza.
Chi vrazza,
i rami virdi da Sicilia,
arrimiscanu a terra,
rumpinu timpuna,
siminanu
e fannu orti e ghiardina.
Chi vrazza ...,
fabbricanu palazzi,
costruiscinu scoli,
ponti,
officini
e aeroporti.
Chi vrazza ,
i lapi di meli da Sicilia
grapinu strati,
spirtusanu muntagni,
svacantanu a panza da terra.
Chi vrazza,
i surdati senza patria,
i sfardati,
i carni senza lardu
vestinu d'oru i porci di fora.
I chiamanu terroni,
zingari
pedi fitusi;
e hanno i figghi e i matri
chi cuntanu i ijorna
cu l'occhi vagnati;
e stu cielu ca vasu,
e sta terra chi toccu
e mi canta nte manu;
e seculi di civiltà
sutta i pedi.
A Sicilia non havi chiù nomi;
ma miliuna di surdi e di muti
affunnati nta un puzzu
ca io chiamu e non sentinu,
e s'allongu i vrazza
mi muzzicanu i manu.
Io ci calassi i cordi di vini,
i riti di l'occhi
pi tiralli du puzzu;
pirchi cca nascivu
e parru a lingua di me patri;
e i pisci
aceddi
u ventu,
puru u ventu!
trasi nt'aricchi
e ciarlaria nsicilianu.
Cca nascivu,
e si mi vasu i manu
vasu i manu di me morti;
e si m'asciucu l'occhi
asciucu l'occhi di me morti.
Cca nascivu,
addattavu nte minni di sta terra,
ci sucavu u sangu;
si mi tagghiati i vini,
vi bruciati i manu!
Non è veru c'amamu a Sicilia
si avemu a storia nto pugnu
e l'affucamu;
non è veru
si addumanu u focu
e l'astutamu;
non è veru mancu
si stamu un ghiornu libiri
e pi cent'anni servi.
Non dumannamu pirdunu a storia
ora ca nni scurdamu
i martiri di tutti i tempi
ca misiru u coddu sutta a mannara
senza chianciri:
Di Blasi, unu (1)
Ora ca nni scurdamu
i torturi nte galeri,
i cunnannati a vita,
i nfurcati,
e l'arrustuti vivi nte chiazzi.
Petri e fangu
Pi cu supporta a miseria,
petri e fangu
pi cu batti i manu e putenti
petri e fangu
pi cu non metti u coddu
nta furca da libertà:
u dicu e siciliani,
e mi scatta u cori!
E fu aeri,
( a data non cunta )
io vitti chianciri i matri
nto chianu da Purtedda, (2)
e Saveria Megna
addinucchiata supra l'erba
parrari cu so figghiu ammazzatu.
Idda u videva,
io no:
u foddi era io
si doppo vitti nersciri di fossi
tutti i morti pa libirtà da Sicilia:
vivi
a migghiara
a marusi
cu focu nta l'occhi!
Dammi la manu
Cola Lumbardu, (3)
( iu parrava cu iddu!' )
sfardati a cammisa, ci dissi,
fammi vidiri i pirtusa nto pettu
Sfunnatu di baddi taliani.
A Bronti, ci dissi,
nto Chianu i San Vitu
dopu cent'anni cu passa
senti ancora a to vuci:
moru pu populu!
Cuntami a storia
Turiddu Carnivali, (4)
(io parrava cu iddu!')
figghiu du nfernu e du paradisu,
cuntami a storia!
Nta stu pugnu c'è a morti,
ti dissiru
nta stu pugnu i dinari,
ti dissiru;
e tu:
a morti,
a morti!
E ci turcisti u pugnu.
L'indumani
a Sciara
i cumpagni
u purtavanu a spadda:
quattru,
sudati,
un passu doppu l'autru.
Ntutt'unu
a cascia
divintò leggia,
ci scappava di nmanu
u mortu un c'era nta cascia,
caminava in prima fila
nmezzu i banneri russi;
a testa,
tuccava u celu!
Cu camina calatu
torci a schina,
s'è un populu
torci a storia.
IGNAZIO BUTTITTA (settembre 1970)
Note:
1) - Francesco Paolo Di Blasi,decapitato nel 1795. Giurista di idee illuministe, autore del "Saggio sopra la legislazione di Sicilia", promosse una cospirazione di un governo repubblicano, Fu giustiziato con tre compagni a Palermo - (Palermo - 20 maggio 1795 - piazza Indipendenza -
2) - Luogo dove Giuliano e la sua banda e infiltrati di mafia, spararono sui contadini che festeggiavano la data "del I° maggio 1947-
3) - Avvocato, fucilato per ordine di Nino Bixio, il giorno 8 agosto 1860, per avere capeggiato una sommossa di contadini; che chiedevano la ripartizione delle terre che era stata promessa da Garibaldi.-
4) - Giovane sindacalista di Sciara, piccolo paese della provincia di Palermo, ucciso dalla mafia il 16 maggio 1955.-
