LA SARVIZZA DI L'ARMA

'Na matina mi fermu ad ammirari

Mastru Cola, chi fa lu fallegnami.

Lu lignu ch'iddu stava pi piallari

Lu vutava e sbutava a la sirrami.

Un corpu po' ci dava cu un scarpeddu,

Pi fallu addivintari un casciuneddu.

S'avia susutu prestu 'dda matina,

Chi prescia ci facia donna Cecè.

Ed iddu, ch'avi  menti saggia e fina,

Li porti nun li fa pi com'è ed'è.

 S'accuntenta di fari sacrifizzi;

Ma li porti nun hannu a aviri vizi.

Cì 'nsigna all'operai cu la saggizza

Chi li sirvizza assai su' chiddi boni.

Lu dari santamenti è 'na sarvizza

Di l'arma chi cu Diu sta 'n cumunioni,

E c'è cu 'nveci curri e fa li 'nbrogghi:

Sulu sordi e nent'avutru arricogghi.

SEBASTIANO BENENATI

DDA PAROLA .....

'A vita è 'na guerra di paroli

C'è cu li usa comu li pistoli

 Cu n'avi picca e li teni 'n piettu

Cu si curca cuomu fussi liettu

M ch'è bella dda parola sincera

Ca spunta 'u suli da primavera

Ch'on  t'a spittavi tu ccussì priziusa

Cuomu 'na carizza, ma amurusa ...

'U cori s'a pigghia e la rimanna

Lu midiusu la senti cunnanna

La pirsuna bedda ni fa tisoru

Crisci  di valuri chiossai dill'oru.

E quannu riva l'ura di muriri

Ca ni tocca  iri di lu Signuri

"Vidiemmu cuomo parri" ni dumanna

" La parola o puostu to ti manna"

E di ddu mumentu nun pò mmintari

Farfantarii nun si puonnu diri,

Ti nesci dda parola do to cori

Ca ti ci misi di ddi primaveri

Dd'amicu  caru cc'a so cantalena

Ca di tia si pigghiava pena:

Appena la pronunci lu Signuri

Ridi ca ti nisciu da vucca un sciuri.

Giuseppe Messina 

U POLITICU CA VULISSI

A politica, si sapi è disgraziata

E a genti 'mmalirici a cu l'ha invintata.

I politici pensunu sulu e cazzi soi

E campari bonu tu  nun poi.

A spiranza pi nui è sempri a stissa

Ca ci fussi unu ca pensa pi stu fissa.

Ju, ni vulissi unu ca nun fa raccumannazioni,

ca sulu pi mia facissi n'eccezioni.

Ci ni voli unu ca nun fa compromessi,

Ma ci dugnu u votu, su fa li me interessi!

Onorevoli, lei nun s'ha occupari di affari!

..... A propositu, pi l'appaltu ca ma vo procurari?

Lei s'ha occupari dei bisogni da le genti!

Ma .... su cci dugnu u votu, nun mi duna nenti?

Ju, si sapi, votu sempri  cu cuscienza,

sulu a cu mi  favorisci  do la prifirenza.

Matrovu sempri disgraziati,

ca macari cu l'avidi fannu patti scellerati.

Onorevoli, favurissi sulu a mia e nun si sapi nenti,

lassa stari a l'avidi ca su un pugnu di delinquenti.

Cu tutti a essiri precisu e misuratu,

tranni cu mia, ca mancu t'ha vutatu.

Alfredo  Ossino