CADIA NA' STIZZA D'ACQUA

Cadia na' stizza d'acqua ad allammicu

davanti lu palluri di la luna.

Nta lu silenziu lu sicchiu pinnia

supra lu puzzu, allatu li limuna,

stancu di li scinnuti e l'acchianati

talia ncelu, comu pi circari.

Gimia lu pernu e puru la catina

appisa all'arcu chi paria d'argentu.

Li chiuppa attintavanu sigreti

tistiannu a li discursa di lu ventu

chi spittinava rosi arraccicati

supra lu tettu vasciu di li casi.

Curcatu lu silenziu supra un ciuri

svigghiava nà nuttata di duluri

e larmi persi mmezzu a tanti spini.

MARIA  FAVUZZA

A SPIRANZA

A spiranza pi l'omu è comu un cuscinu

ca l'accumpagna pi tuttu u so camminu.

Quannu è nicu e nun canusci peni,

ci lu cucchi e tuttu lu cunteni.

Di supra ci dormi beatu

di la speranza si senti annacatu.

Poi, passa u tempu e crisci

e lu cumpagnu di sutta ci sparisci.

Quannu è granni e s'arriposa

sulu a testa acchiù ci posa.

Quannu è vecchiu, e è sulu,

si cucca a sira e ci pari duru.

Poi, a notti s'arruspigghia,

moddu ci pari e sonnu nun pigghia.

Sulu quannu mori c'arriposa cuetu finalmenti,

ma tannu, di spirari nun avi nenti.

ALFREDO OSSINO

'NCERCA DI CUMPAGNIA

'U surrisu: Ricchizza di l'omu

na ricchizza c'ugnunu po' aviri

un poi diri, 'u fazzu ma comu

l'u' poi fari: E poi dari piaciri.

Mentri riri: Tu crisci l'amuri

fai di rosa ..... Pi fina 'l'u diri

e la pirsuna: Ti gusta sapuri

tanta gioia, c'ognunu ci criri.

U' labbru, ha un granni putiri

s'a' to' vucca .... surridiri sà

pi cu talia ....... si crisc'i' rispiri.

Ti ridduci l'u' mali ..... a mittà

alluntana l'u' tantu suffriri

su' to' labbru, stu rialu l'u' fà.

PAOLO  RUGGIRELLO

LA MAMMA

L'amuri di la mamma è straputenti

E pi li figgh' cosi ni fa tanti.

L'aiuta 'nta li vai e 'nta li stenti

E ci duna lu cori a tutti quanti.

Ci sparti puru l'arma, ed è cuntenti:

Voli cuntenti a tutti pì davanti.

E l'accuntenta 'nta qualunchi cosa,

E pi li figghi peri nun ni posa.

No, nun ni posa mai, sta n'muvimentu.

Travagghia  p'aiutari a tutti quanti.

Anchi si figghi ci n'avissi centu,

A tutti li cummogghia cu lu mantu.

E si la vita so' la passa a stentu,

A nuddu lassa misu 'n quarchi cantu.

Tutti li cerca e li voli prisenti

E sentiri 'un ci fa li patimenti.

Patimenti pi figghi è tristi cosi

Supportanu li matri, e su amurusi.

Puru si lu distinu  ad iddi vosi

Dàrici dispiaciri  cchiù gravusi.

Spissu li figghi 'un ci dunanu rosi

Pi cumpenzu a li meriti, e hannu scusi

Pi  vulirisi jnchiri la sacchetta,

Anchi si so mammuzza va a fa detta.

SEBASTIANO  BENENATI