Mi dasti la vita, eppuru m'ammazzasti,
mi dasti la minna, eppuru 'un mi vulisti,
mi dasti lu cori e poi mi lu spizzasti,
mi dasti l'amarizza e nun chiancisti.
Tuttu mi dasti e poi ti lu pigghiasti;
avia pitittu e tu stavi a li visti,
sintia duluri e tu mi vastuniasti,
Sicilia mia, chi mali mi facisti!
E ora sugnu ccà a la strania,
mi sentu sulu 'mmezzu a tanta genti,
'unn'haiu chiù scopu nta la vita mia,
travagghiu sempri e nun varagnu nenti.
'Unn'haiu chiù nenti, unn'haiu la matri mia,
luntanu sunnu amici e li parenti,
mi manca lu suli di la terra mia,
m'arresta lu travagghiu e li me' stenti.
Ju cc'ivi l'atru jornu all'ariuportu
e vitti un sicilianu chi partia,
mi dissi: --- paisà ... soccu ti portu;
anticchia i suli, o tu veni cu mia!? -----
----Avi vint'anni c'a nun haiu cunortu,
porta 'na petra, o soccu piaci a tia,
e dicci chi puru mezzu mortu,
vogghiu turnari 'nna la terra mia.
Altese Leonardo
Nessun commento:
Posta un commento