Fazzu lu picuraru e lu viddanu,
travagghiu notti e jornu di cuntinu,
la cammisa la suru e la trapanu,
la testa mi firria com'un mulinu.
Li sordi viu sempri di luntanu,
la curpa è tutta di lu me' distinu,
m'aiutu cu la menti e cu li manu
e sugnu sempri misiru e mischinu.
Patruni 'un sugnu di sordi nè d'oru,
diri nuddu lu pò chì sugnu avaru,
nun pozzu diri a Diu quannu chi moru:
Li figghi mei li beni si pigghiaru.
Si, li ricchizzi mei e lu mè tisoru
esti lu sensu meu priziusu e raru,
'sti preggi chi mi detti la natura,
cu mia li portu 'nta la sipultura.
Paura 'unn'haiu d'essiri arrubbatu,
nunn'avennu ricchizzi pursirutu,
si li latri mi passanu d'à latu,
eu sugnu sempri orvu, surdu e mutu.
Caminu sulu senza accumpagnatu,
e d'unnì sugnu e vaiu un cercu aiutu,
lu pani chi mi manciu è travagghiatu,
e prestu mi nni vaiu com'haiu vinutu.
Fonta Antonino
Nessun commento:
Posta un commento