Pinsaru un ghiornu, tutti l'animali,
Di vuliri furmari un cumitatu,
Pi un dicretu a carattiri naziunali
A sullivamentu di lu prulitariatu.
Ntirvinni lu liuni,
Lu cervu ncurnacchiatu,
Lu cavaddu mbizzarritu,
Lu corvu mascariatu,
L'orsu ticu ticu,
Lu sirpenti scacchiatu,
L'elefanti cu l'amicu,
Lu cunigghiu nfattariatu.
E dopu la pantera,
Lu gurilla, lu scimmiuni,
La zebra e parintera,
Un granni esercituni
Di armali, manzueti,
Bizzarri, nferuciti,
Di tutti li cuntrati
E di tutti li partiti.
Ddopu chi furmaru
Lu dicretu pi l'elettu,
Vittiru spuntari
Un sceccu c'un carrettu.
Ci dissiru chi voi?
Vogghiu iri a lu Sinatu!
Pi cchistu fici u carricu
E sugnu ncravattatu.
Rispusi lu liuni,
L'aquila e lu beccu:
Ma nun è mai possibili
A lu Sinatu u sceccu!
Comu si pò mettiri
Nto ntavulinu stranu,
U sceccu disignatu,
Cu carta e pinna mmanu?
Riuneru lu cunzigghiu
E tutti decretaru:
Pi cunchiuriri lu numaru
Ddu sceccu l'assittaru.
SERAFINO CULCASI
Nessun commento:
Posta un commento