UN PIZZUDDU DI LU CORI

(Diàlocu di un picciriddu di lu Terzu Munnu

cu 'n autru picciriddu occidentali)

"Nicuzzu occidentali, chi stai bonu,

Furtunatu si tu 'ntra tanti beni.

Lu Natali lu fai 'ntra scrusciu e sonu.

E jè soffru, a lu friddu, guai e peni.

Si stancu di manciari cuddureddi.

E ghiè mi cuntu li me' custiceddi.

Anchi tò  ziu ti purtau un treninu

Elettricu, chi si cumanna a manu.

Lu pandoru ti detti to' parrinu

E lu flipper to' patri, ammanu ammanu.

Je 'un haiu nè pandoru e nè vasteddi

E jocu quasi sempri a li ciappeddi.

To, matri fa la cura dimagranti,

Pi megghiu stari: ma esteticamenti.

Chidda mè  'nveci sta a panza vacanti:

Trenta grammi di risu  sunnu nenti.

E mè patri è arridduttu comu un croccu;

Si teni forti quannu c'è sciloccu.

A la to' chiesa sona la campana,

Avvisa già chi  nasci lu Bamminu.

La genti è 'n pressu, la menti è luntana,

Si 'mbriaca di iduli e di vinu.

Diu si rivela 'nta 'na nica grutta.

Campa la genti: ma dintra è distrutta.

Pi casa ci hai un granni appartamentu,

E lu stanzino to' pari un'incantu.

To' patri avi un "millennovicentu",

Assicuratu pi ' un aviri scantu.

Jè dormu sutta li stiddi e la luna.

Cu li 'ammi mi spostu ad una ad una.

Attenta lu me griru amicu miu.

Pirdunami si sugnu in Terzu Munnu.

Jè sugnu scarsu. Però haiu a Diu;

E cu Diu 'nta lu cori 'un mi cunfunnu.

Pi tia 'un tegnu 'mmiria e nè rancori.

T'addimannu un pizzuddu di lu cori".

Sebastiano Benenati