Nta lu chianu da Purtedda chiusa a n'mezzu a ddù muntagni
c'è na petra supra l'erba pi ricordu a li cumpagni.
A l'addritta nni 'sta petra a lu tempu di li fasci
un apostulu parrava di lu beni pi cu nasci.
E di tannu finu a ora a Purtedda dà Ginestra
quannu veni 'u primu maggiu 'ì cumpagni fannu festa ...
E Giulianu lu sapia ch'era 'a festa di li poviri,
'Na jurnata tutta suli doppu tantu tempu a chioviri
Cu ballava, cu cantava, cu accurdava li canzuni
E li tavuli cunzati di nuciddi e di turruni!
Ogni asta di bannera, era zappa, vrazza e manu
Era terra siminata, pani càudu, furnu e granu.
La spiranza d'un dumani chi fa 'u munnu 'na famigghia
La vidèvanu vicinu e cuntavanu li migghia,
l'uraturi di ddu jornu jera Japicu Schirò,
dissi: " Viva 'u primu maggiu", e la lingua ci siccò.
Di lu munti 'ì la Pizzuta ch'è l'artura cchiù vicina
Giulianu e la so banna scatinò a carneficina.
A tappitu e a vintagghju,
mitragghiavanu la genti
Comi fauci chi meti
cu lu focu 'ntra li denti,
c'è cu cianci spavintatu,
c'è cu scappa e grida ajutu,
c'è cu jetta i vrazza a l'aria
a difisa comu scutu ...
E li matri cu lu ciatu,
cu lu ciatu - senza ciatu:
- Figghiu miu, corpu e vrazza
comu 'nchiommur' aggruppatu!
Doppu un quartu di ddù 'nfernu, vita,morti e passioni,
'ì briganti si nni jeru senza cchiù munizioni,
arristar a menzu o' sangu e 'ntà l'erba di lu chianu,
vinti morti, puvireddi, chi vulianu u munnu umanu ...
E 'nta l'erba li ciancèru matri e patri agginucchiati,
cu li lacrimi li facci ci lavàvunu a vasàti.
Epifania Barbatu, cu lu figghiu mortu 'nterra dici:
" A li poveri, puru ccà, ci fannu a guerra ..."
Mentri Margarita la Glisceri, ch'èra ddà cu cincu figghi
arristò morta ammazzata, e 'nto ventri avea 'u sestu figghiu ...
'A 'ddu jornu, fu a Purtedda, cu ci va doppu tant'anni,
vidi morti 'n carni e ossa, testa, facci, corpa e jammi,
vivi ancora, ancora vivi e 'na vuci 'n celu e 'n terra,
e 'na vuci 'celu e 'n terra: O justizia, quannu arrivi?
O giustizia, quannu arrivi?||
Ignazio Buttitta
Nessun commento:
Posta un commento