Un gaddru 'i Sciacca tutti li matini
cantava arruspigghiannu li gaddrini
poi cuminciava a fari lu viziusu
cu chiddri chi tinianu 'u culu 'nzusu.
Era lu pridilettu di puddastri
chi mustravanu tutti li pilustri
e appena chi facia chicchirichì
tutti, e so' peri, a dirici di sì.
Si la spassava di notti e di jornu
dintra li gaddrinara e puru 'ntornu
scattiava cu l'amici e li vicini
puru chi ciocchi e cu li puddicini.
Li gesti, di stu gaddru timirariu
varcaru, prestu tuttu 'u circundariu
si nni parlava a Gangi e puru a Tripi
si nni parlava finu a Carrapipi.
'Na ciocca, ch'avia l'arti di maistra
si trucca tutta e pari 'na puddastra
'na spicciata si duna a li capiddri
anticchia i lacca e fà sbiddiari 'i stiddri.
Si 'nfila 'u reggipettu pi li minni
chi ad iddra ci'accuppuna sulu i pinni
poi li quasetti cu la giarrittera
e pari 'na pupiddra di la fera.
Pigghia lu trenu pi purtarisi a Sciacca
a' tracollu si metti 'na buggiacca
appena 'u trenu a stazzioni s'arresta
'u gaddu 'a viri e cci perdi la testa.
Cerca d'allisciarici la pilustra
pirsuasu chi si tratta di puddastra,
macari di discinnenza paduana,
e nesci foddri p'aviri 'sta buttana.
A nuddra puddrastra avia datu 'mpurtanza
facia 'u addruzzu, ma nò 'a sudditanza
ma ora, cu chista, cci vuncia 'u respiru
signu chi, ormai, carìu comu un piru.
Iddra s'arrassa, si fingi affruntata
si metti assicutalla strata, strata
appena 'a strata cci duna a vutari
'u gaddru talia e la ciocca scumpari.
Curri e li forzi cci vannu ammancannu
firria comu un foddri e va addumannannu
nuddru sa' diri, dunn'è 'sta baldracca
lu ciatu scarsia e lu cori si spacca.
La testa 'un reggi, si jetta sfinutu
'unciari 'un pò, perciò arresta mutu
propriu a 'stu puntu cumpari la ciocca
sfinutu 'u viri e c'ù beccu lu tocca.
Cci gira 'ntornu, 'sta ranni schifia,
cci licca li peri e cc'ì pizzulia
un pizzicu all'ala, un pizzicu a chirca
'u gaddru si smovi ma nenti pillicca.
Vulissi agguantalla e tutta vasalla
ma iddra si cerni ed intornu cc'abballa
lu gaddru capisci ch'è cugghiunatu
si sbota 'u coddru e si ecca di latu.
Lu sfuttinu li ciocchi e li puddastri
li puddicini dintra li cannistri:
"comu t'arridducisti gaddru 'i Sciacca
fariti pizzuliari di n'na ciocca"
Quantu Gagà, nuveddri Rodomunti
li cui bravati varcanu li munti
appena su' ravanti 'na baldracca
fannu la fiura d'u gaddru di Sciacca.
Anonimo
Nessun commento:
Posta un commento