A SICILIA

A Sicilia è comu na macchia, ranni,

ricca 'nta ogni ramu,

e circannu senza affanni

tutti i frutti c'attruvamu.

'Nta nu ramu c'è l'intelligenza,

lassata, pi li generazioni

dè patri nostri di tutti li nazioni

Greci, Romani da Spagna e da Pruvenza.

Nta nu ramu c'è la stuzia umana

e chista, .... è propiu cosa siciliana.

Poi ci sunu antichità, mari munti e paesaggi

ca sulu a vidilli parunu miraggi.

E vicinu a li rarici di 'sta macchia

c'è na terra tantu ginirusa, ca è na pacchia.

Ora, pari ca sta macchia è malata

e tutti hannu decisu ca và curata.

Però nun si capisci quali simenza

ha fattu crisciri u ramu di la dilinquenza.

'Nta stu ramu, crisci, a ta sapiri

'n fruttu, tantu duci d'assaggiari.

Esperti di tuttu u munnu hannu attruvari

qual'è a cura giusta d'adottari.

E mentri sunu attornu all'arvulu a studiari

ogni tantu, unu allonga a manu pi mangiari.

ALFREDO OSSINO