Avennu 'nta li manu lu cuteddu,
sennu dicisu e prontu pi scannari,
taliannunì accussì dissi un agneddu:
Chi t'haiu fattu, ca mi voi ammazzari?
Ancora sugnu nicu, nuccinteddu,
pensu chi mi putissi pirdunari!
Allura arrispunnivi: Amicu beddu,
si nun t'ammazzu, eu com'à campari!
Lu munnu è chissu chi lu puvereddu
travagghia pì lu riccu sputruniari.
Mi rissiru quann'era picciutteddu ,
chi li 'nnuccenti su sempri a pagari
e cu' è chi stà dintra assittateddu
lu sangu asciuca a nìatri e fa dinari.
Capiri nun poi tu, chi si armaleddu,
chi la natura nuddu pò canciari.
Lu spertu si la scutta cu lu fissa
e pi tia agneddu, la cunnanna è chissa!
Fontana Antonino
Nessun commento:
Posta un commento