A LIGGI

L'omu,è cunfirmatu di la scienza,

di l'animali havi la discinnenza.

Di diri sta cosa, nun sugnu cuntentu,

ma di li bestii, avi puru lu cumportamentu!

Spissu l'istintu di supravvivenza

ci fa fari i cosi cu 'ncuscenza.

I so simili cunsidira rivali,

comu fannu tutti l'avidi armali!

Lotta, robba, ammazza puru l'amici

e è cummintu c'accussì campa felici.

Da quannu Adamu fici u primu tradimentu

sempri continua e mai è cuntentu.

I diritti di l'avidi nun hannu 'mpurtanza

pensa sulu a la so cumminienza.

Da li tempi antichi, lotta pi ogni cosa

mai si stanca e mai si riposa.

Però, 'cu tempu, ha caputu l'importanza

di raggiunari cu 'n pocu  di crianza,

pi forza di cosi s'amparatu,

ca ci voli ordini 'nta lu criatu.

Oggi, ci voli, a civiltà imponi,

una cosa, ca risorvi a situazioni,

una cosa, ca tutti hanu a rispittari,

soffrunu i debuli, ma ponnu campari.

Accussì, a spirimintatu un marchingegnu

ca ha essiri di tuttu u munnu lu sustegnu.

Pi simbulu, ci ha misu una valanza

cu na scritta, ca ni cunta l'impportanza.

Sta cosa, si rici ca pi funzionari,

havi bisognu ca sempri ritta a ristari!

Ma a natura si sapi, è disgraziata

e 'sta vilanza abbucca sempri di 'na latata!

Allura, curri l'omu p'aggiustalla,

s'appenni di un latu, ma attonna e sballa,

currunu avidi, p'aggiustari a situazioni

e s'appenninu pi farici cangiari posizioni!

Di sta cursa, u sapiti u risultatu,

è ca valanza 'na naca a divintatu.

Ma si sapi, l'oggettu di lu jocu

finisci, ca dura sempri pocu!

O spissu, s'arrumpi 'sta vilanza

co sulu scopu di inchirisi la panza!

ALFREDO OSSINO