Un cani troppu spertu e mariolu
facia spissu li notti dammaggiati
li addineddi li pigghiava a volu
dintra lu addinaru arrisittati;
era un canazzu 'rossu spataiolu
di lu patruni sò 'un timìa lignati,
birbanti fu di nascita cagnolu
criscennu jia pigghiannu mali strati.
Tinia li vicinanzi arrabbiati
jia facennu sempri matascini
satava mura e li ritticulati
mangiava sciocchi cu li puddicini;
senza sordi facia li gran mangiati
si mantinia grassu a du' carini
e poi durmia cu tranquillitati
di carni e ova li sciancazzi chini.
Però cì fu 'na notti la sò fini,
scattia pi li pecuri e l'agneddi,
la mànnara satau di riti e spini
e assicutava tutti l'armaleddi.
Lu picurararu a li trappiatini
armatu curri 'ncausi di peddi
ci spara quattru corpa e l'ammazzau
morsi lu cani mancu fici bau.
S'un era dilinquenti e lazzaruni
sarissi vivu cu lu sò patruni.
Giuseppe Settimu Scuderi
Nessun commento:
Posta un commento