O carritteri cu la zotta 'manu,
crisciutu a la furtura d'un stratuni!
Sentu la vuci, sentu li cianciani,
lu trangulu c'annaca la canzuni
e l'ecu si la porta pi li valli.
D'arbi e di suli comu 'mbriacatu,
lenti li retini e fai lu pinnicuni,
lu fidu cavadduzzu 'mpinnacchiatu
passa li fossa, scansa li pitruni,
ti porta nachi nachi pi la strada.
Di lanigghi e spicchietti 'ncurunatu
tira cu orgogliu lu trufeu anticu,
o carru di la storia pitturatu,
cavaddu chi di l'omu fusti amicu!
Spartivi li pinzeri duci e amari,
tinivi supra lu pettu lu gran pisu.
Si all'acchianata anticchia arripusavi,
pigghiannu ciatu sempri malumisu,
scruscia la zotta, signu d'avanzari:
scattavi a 'du cumannu e ripigghiavi.
Li petri ti tagghiavanu li peri,
ma tu sintivi dintra lu to cori
la vuci duci di lu carritteri,
chi la to vita era, lu to cori.
MARIA FAVUZZA
Nessun commento:
Posta un commento