Nanài Sciarrinu e Pèppi Liticùni
avianu a limitu, pòrta e purtùni
puru a li pila ccì facianu càsu
e passari un 'nnavia na musca pu nàsu.
A Peppi 'u sceccu ccì satau lu mùru
lassau la stadda sò locu sicuru
dammaggiu fici 'nnà l'ortu a finaita
e picca mancau chì finissi a fàida.
Nanài era assai fucùsu, di caràttari
'nni Peppi 'ccì jiu, cù boria, a ribbàttiri
appena ch'arrivàu misi 'ì bannètti
e picca mancau chì pira 'un 'cci rètti.
Vulia pagatu lù dannu a la lìra
chiddu di li mulùna e di li pìra
'ntimidiu puru là settima rèra
ch'avissi fattu di tutti stramèra.
Peppi ch'era però un omu saggiu
ricanuscìu di lu sceccu 'u dammaggiu
tuttu nun lu vulìa però paari
prontu sulu 'na mànu era a tagghiari.
Nanài, sfirriusu, nùn capiu raggiuni
l'omu ch'è omu nùn fa lu minchiuni
cu 'sta pruposta sì 'ntisi 'nsultatu
e a ribbattiri jìu 'nnall'avvocatu.
Pi la difisa di li so' 'nteressi
cci misi all'avvocatu Causipessi
summu avvocatu, prìncipi r' 'u foru
cc'avia difisu là causa a so soru.
Lu tortu paria di Peppi lampanti
avia lu sceccu fattu lu briganti
sbaglia lu sceccu e pàga lu patruni
picchì la liggi nùn talia raggiuni.
Poi nun sapennu 'ì mòssi di Nanai
a Causipessi ccì cantau li vai
chistu tranquillu lu fici sfuari
cci dissi poi: << difènnu a to cumpari >>.
Però cci vosi dari un bon cunsigghiu
rivolgiti al collèga meu Cunigghiu
porta 'sta littra d'accumpagnamentu
e bonu ti farà lu trattamentu.
Peppi si misi, lèstu a caminari
putia supra li spisi sparagnari
piegau la littra e l'à misi 'n zacchetta
'nna la parti di dintra d' 'a giacchetta.
Camin facennu s'àguzzau lu 'ngegnu
la testa dura sèmpri 'un è di lìgnu
comu fimmina ch'è cusiritèra
scirau a littra e liggìu chiddu chi cc'era.
" Carissimu cullèga meu Cunigghiu
mannu stu pollu pì daricci un cunsigghiu
fa la parigghia cù 'n'autru picciuni
chi tegnu dintra già 'nto me casciuni.
Cerca lu modu dì fallu 'nfutari
e prestu li facèmu poi scannari
quannu capemu chì aggir si pò
pi unu cci pensi tù, pi l'autru jò>>.
Peppi calculau chì tuttu 'stu 'ngannu
chiossai putia custàrca di lu dannu
misi al correnti d'ù fattu a Nanài
chi pi sta littra avia li stessi vài.
"Finemula cu tùtta 'sta vriogna
semu 'nte manu dì genti carogna,
'ncucchianu i testi, pi falli truzzari,
comu picciuna nnì vonnu spinnari".
Puru, allura, Nanài si cummincìu
comu putia finìricci a schifiu,
un tintu accordu dòppu ch'è firmatu
è megghiu di li vài d'un avvocatu.
Peppi e Nanài imitàru a Salamuni
truvaru l'accordu e pùru la raggiuni
vali chiossai la pàci di la verra
quannu a cunfini sì teni la terra.
Si l'avvocàtu aggàrra a unu minchiuni
finisci sempri chì havi raggiuni
cu si fida perciò di l'avvocatu
affrittu campa e mòri poi spinnatu.
ANONIMO
Nessun commento:
Posta un commento