Turi "Sganghettu", chìanci rispiratu
d'essiri nun crirìa malassurtatu
spusau la figghia cù Peppi "Fannulla"
omu chi tuttu 'u jòrnu si trastulla.
Un vili e tammurìnu bonu a nenti
abbili a fari sùlu 'u strafuttenti
si cc'è ri travagghìari s''a sparanza
comu sol dirsi, hàvi ossu 'nna panza.
Turi 'u sapia però avia spiratu
di villu roppu spùsu sistimatu
certu 'un avissi aisàtu mazzacani
ma s'avissi abbuscàtu un tozzu pani.
La figghia, mantinùta 'nna l'ovatta
prova 'sta ''nubbirtà'' e si cc'adatta
'sta donna ch'era còsa ri vitrina
cu Peppi jiu a finìri rintra 'a trina
Prestu si misi a fàri 'a strafallaria
letta scunzati, càsa a gamm'all'aria
tuttu lu jornu stàva a chiacchiariari
passava 'u tempu cù li so cummari.
Pi cucinari pèggiu ri 'na schiappa
cucinava la pàsta a ficacchiappa
la carni fritta ccì vinia arrustuta
sicca 'a sasizza oppùru arripuddruta.
'Un era bona fimmina di casa
ma bona era pi fàri u vasa vasa
ammatula chi Tùri chianci 'a figghia:
nuddru si pigghia s'ùn s'àrrisimigghia
L'irvazza tinta stà cu la mal'erva
si 'ntrizza, fà patrùna e fà la serva
comu spissu succèri c''a 'ramigna
tuttu 'u tirrenu, rùnni crisci, 'ntigna.
Si 'nfila 'nno tirrènu cultivatu
runni lu zappa avia già zappatu
e propriu quannu pàri chi si stracqua
ritorna a galla còmu ogghiu nall'acqua.
Lu viddranu cuntìnua a darci 'n sutta
ma 'sta mal'erva è donna currutta
s'ammisca chi so' pàri li pirocchi
distruggi: rapi, càvuli e finocchi.
'Sta malatia nun sì pò scattivari
nun cc'è dutturi ch''a sapi curari
havi li setti viti comu 'a 'atta
appena 'a tagghi, sùbbitu, ti scatta.
Havi p'amica strìtta la zizzania
mentri dorminu ccì veni la smania
e 'un su capaci mài di ripusari
pinzannu o' mali chì hannu ri fari.
La zizzania è èrva rinomata
si cc'è iddra cc'è ri canciari strata
fa divintari là meggh'erva tasciu
e si nni fa ri tùtta l'erva un fasciu.
Quannu 'na manu cù 'n'autra si stringi
si puru lorda è l'autra si tingi
immeci si la mànu 'unè 'nzivata
nesci pulita, c'à manu lavata.
Allura si a pirsùna è cumpita
stringi la manu a cù l'havi pulita
mentri si la pirsuna è balorda
runa la manu a cù cci l'havi lorda.
E si raccunta chì un patri e un figghiu
jeru a tagghiari dìsa ad oltri un migghiu
muntaru 'na muntàgna viola viola
e cunsumari rì scarpi 'a sola.
Quannu arrivaru s'àppiru a sbrazzari
e accuminciaru là disa a tagghiari
miteru, senza sosta, 'na jurnata
poi cuminciaru a mèttila 'nfasciata.
Lu figghiu rici 0' pàtri: - ora taliamu,
'un avemu purtàtu mancu un liamu!
comu, cu' va a metiri, si scorda
di purtarisi apprèssu 'anticchia corda?.-
Lu patri rici o' fìgghiu: - sbarbateddru,
'mparasti a comu usàri lu cuteddru,
ti 'mparasti a 'ncugghiàri la cammisa,
'mpara ch''a disa si 'nfascia c''a disa.-
VINCENZO ADAMO
Nessun commento:
Posta un commento