SICANIA BEDDA

Sabatu sira Diu lavàu li manu

stancu, cu lu duluri nni lu schinu,

ca dannu vita a l'universu sanu

ci travagghiò se'jorna di cuntinu.

'Na  nuvulidda si furmò divanu,

e 'na stidduzza addivintò cuscinu,

'u suli cupirtedda di Buranu,

'a luna linzuleddu mistu linu;

lu ventu fici 'a vuci di supranu,

lu mari pizzicò lu minnulinu,

'ntunò l'arcubalenu'u marranzanu,

fici di prima 'a terra cu viulinu;

poi l'angiuliddi e stu cuncertu arcanu

cantaru 'a ninna nanna a lu Divinu

ca pi dda vota fu n'essiri umanu

durmennu tutta 'a notti a sonnu chinu.

Appena si svigghiò nni lu matinu,

ci parsi c'hava fattu 'n sognu stranu,

pinzò di cuntrullari ddà vicinu

e in ogni locu 'nta lu munnu sanu;

c'era 'n puntinu 'n mezzu di lu mari,

ca sulu iddu lu putia vidiri,

ddu sognu 'ncuminciò a divintari

'na terra tutta 'nciuri a nun finiri;

sintènnu tanti raffinati oduri

dda meravigghia la vulia capiri,

taliannu tutti 'nsemi ddi culuri,

l'Onnipotenti nun sapia chi diri,

chi paraddisu! Fu chiddu ca pinzàu,

nun pari veru a mia ca sugnu Diu;

ci fici 'na carizza e la vasàu,

cu l'acqua di lu mari 'a binidiu.

Poi dissi cu la so pussenti vuci,

Sicania ti vattiu, terra d'amuri,

unni ogni cosa nasci e riproduci

li megghiu frutti e profumati ciuri

e vui sicani ca li figghi siti,

vi raccumannu, nun la ruvinati!

Guditivilla mentri ci l'aviti.

Nautra matri? No … nun la truvati

     SANTO GRASSO