Penzu e ripenzu cu malincunia
quant'era brava la povira genti.
Chi ghiè 'ncuntrava spissu pi lavia:
eranu cari amici o me' parenti.
Tanti su' morti o sunnu a la strania;
Tanti, malati, e pàrinu 'ncuscienti,
picchì nun hanu cchiu la nostalgia
di quannu eranu allegri e surridenti.
Penzu e ripenzu ad una picciuttedda
di cori allegru, ch'era 'nnamurata,
d'aspetto puru, di facciuzza bedda,
avia lu zitu ed era aggraziata.
La ricordu quann'era spusinedda
e a novi misi matri furtunata.
Passàru l'anni ed assuttigghiatedda
squagghiau comu 'na ciura spampinata.
Maria Teresa Cassarà
Nessun commento:
Posta un commento