Quannu eri nica nica
to matri, annaculiàva la to naca
e cu amuri, sciugghia a menza vuci
‘na ninna nanna accussì duci
chi l’ancili di’’ncelu, pi allietàri
li to’ sonni, ‘un tardàvanu a calari
Grannùzza,’ntra li tanti piccirìddi
eri fistusa quali passarèdda
e spuntulidda, pigghiàsti la biddìzza
di la rosa, di la viola la ducizza.
To matri ti taliàva, ni gudia
e parlava di tia cu Gesù e Maria.
Ma un jornu arrivàu un cavalèri,
amurùsu, gentili, furustèri.
La frùnti di zagarèddi t’adurnàu.
E sutta n’autru celu ti purtàu.
La matri chi ti crisciu cu ‘u so ciàtu,
teni a menti ddu jornu pi tia biàtu.
Ora crucchiulìdda sula e stanca,
avi la testa chi cci trema bianca;
talùra culluquìa tacita cu tia,
d’aviriti vicina sìaddisìa
ma si cuntènta di parlari di tia
cu Gesù, cu Giuseppi e cu Maria.
M.Di Gaetano Ferrara
Nessun commento:
Posta un commento