U vicchiareddu, di còccia
di càmula pigghiàtu
Vidènnu chi l’ògghiu
di la so làmpa s’assuttigghia,
a ddu quatru chi penni
scurdatizzu di lu muru,
suspirànnu di so’ vrazza stenni
“E’ Signuri – dici trimànnu –
accussì afflìttu e mali
arriduciùtu comu sugnu,
concèdimi tanti e tanti
àutri jòrna di campàri.
Fammi sèntiri ancora vuci
di munnu e festa di campàni
e vìriri azzòlu di celu
e biddizzi di criàtu.
Si pi umana dibilànza
aju currùtu darrèri
a cosi vani, pirdùnami.
Prumèttu di fari la nuvèna
di Natali, di urnàri di ciùri
li to’ artàri, ma tu,
dùnami tanti e tanti
àutri jàrna di campàri”
M.Di Gaetano Ferrara
Nessun commento:
Posta un commento