'Na matri di famigghia, assistimata,
di veru onesta, massara e pulita,
puru di'mmernu travagghia sbrazzata,
e la so facci è sempri culurita.
Avi 'na figghia sula, addisiata,
chi quannu ci nascì, ni fu giuita,
e a lu pittuzzu so' si l'ha allattata,
e l'ama e stima cchiù di la so' vita.
Lu tempu passa e 'sta figghia è cresciuta,
ed è cresciuta assai malarucata,
lagnusa, rispustera, 'mpuntunuta,
picchì so' ma' la teni sminzigghiata.
'Sta matri è veramentì scuntinuta,
e di sta figlia so' tutta pirata,
ma jè la viu troppu 'ncafunata,
picchì sta figlia teni dilicata.
Mai nun ci fa lavari un fazzulettu,
a tavula ci porta anche lu piattu,
ogni matina ci conza lu letti,
mentri la figghia alliscia lu so attu.
Cu li labbra tinciuti di russettu,
cull'ugna longhi e culurati a smartu,
cu la collana d'oru e spilla 'n pettu,
spissu si va 'mprufuma, e nasci a scattu.
A chissa matri jè vulissi diri:
"sti versi nun li scrissi pi sparrari,
vui matri aviti lu sacru duviri
dì'nzignari li figghi a travagghiari.
Li sminzigghieddi lassàtili jri,
picchi li figghi si ponnu avvizzirai,
li mariti vi ponnu malidiri,
chi vui nun li sapistivu 'nzignari.
Antonio Battaglia
Nessun commento:
Posta un commento