Salemi è lu caru me paisi
chi di peni cunfusu,p'ogni mali
prumetti cu fidi a San Giuseppi
nna cena fulcuristica spiciali.
Votu pussenti, sia pi malatia
o pi disgrazii, o peni di lu cori;
votu chi tra prieri, genti pia
dumanna grazii cu fedi c'un mori.
Pani di San Giuseppi, scartucciatu,
fraganti, biancu, tantu sapuritu,
lucenti d'ovu, d'oru mpaniddatu,
di ciuri e giuggiolena rifinutu;
la parma, lu vastuni, u cucciddatu
pari scurpitu d'un artista anticu
cu stili di valuri assai prigiatu,
battutu, adaciu, cun marteddu nicu.
Archetti virdi, a forma di cappella,
d'addavuru,e appisi li lumiuna,
aranci, cudduredda, lumincella,
rametti di piridda, favi, pruna.
Rappuliddi di scura racina,
fatti di pasta bianca e vinu cottu,
cannistreddi di frutta miscati
fatti di pasta chi pari viscottu.
Tra siti antichi e cutri risplendenti
copri la mensa tila arriccamata;
lu vinu odura nmezzu la lattuca
chiusa comu nna rosa incappucciata.
Nta sferi di cristallu trasparenti
li pisciteddi d'oru macchittati,
dintra dd'acqua chi luci lenti lenti
s'affannanu a firriari senza ciatu.
Tri picciriddi stannu mpersunannu
San Giuseppi, la Madonna, lu Bamminu;
s'assettanu a nna tavula riali,
lu pranzu scurri tra lu ncenzu e vinu.
Gustusi e vari sunnu li pitanzi
priparati cu amuri pirsunali;
fritturi, pisci, dorci,ova, sustanzi,
piatta di maccarruna triunfali.
Sarvietti bianchi, tissuti di casa,
li megghiu piatta cu pasta cunzata,
si mannanu a l'amici e a li vicini
pi cummitalli a dda cena sacrata.
La sira passa lesta in armunia;
passanu ogni tantu li bicchera
e accumpagnata di lu sunatura
s'intona la gluriusa litania.
Cena di San Giuseppi, fidi, oduri,
di grazi i di fulcluri tramannatu,
di genti timurata chi cu amuri
lu santu mastriceddu unn'ha scurdatu.
MARIA FAVUZZA
Nessun commento:
Posta un commento