CAMPAGNULEDDA

Campagnuledda, quantu si baggiana!

Quannu chi affacci tu, spunta la luna.

Si comu un'acqua frisca di funtana,

chi metti 'n muvimentu la pirsuna.

Cu 'na faretta di sita o di lana,

ognunu chi ti viri, s'abbannuna.

Quannu chi passi tu di lu me locu,

'nta li me' vinì mi sbampi lu focu.

        Cu 'ssu sciallu chi ti metti

                 e capiddi chi ti sciogli,

                 stu me' cori lu trascini,

               comu nenti, tu mi cogghi.

Campagnuledda sempri 'nfacinnata,

tu sempri sì a cuntattu cu la crita:

E'n mezzu l'acquazzina 'mpappìnata,

nun avì mai risettu la to vita.

All'alba, quannu fa la to' cantata,

cu'ssa to vucca frisca e sapurita,

l'aceddi chi su' fora a la campia,

attornu si ni stannu e ' nsemi a tia.

                 Si t'avissi pi un ìstanti

               jè vicinu,a lu me 'tornu,

                  puru fussi scuru fittu,

                  mi parissi menzjornu.

Tra cògghiri la livi e la vinnigna,
allegra è puru tutta la campagna,
tu stai 'n menzu a 'ddì pàmpini di vigna,
chi l'acquazzina li to manu vanga.
Siddu 'ssa manu tuccassi 'sta tigna
e di stu cori mi fussi cumpagna,
lu celu jè tuccassi cu li manu,
e ti dunassi jè lu munnu sanu.
               Canti comu 'na sirena,
               ni stu mari senza funnu,
                   si lu spassu di la vita:
Lu cchiù beddu di 'stu munnu.
Giuseppe Coraci