Li vespi sunnu sempri arrabbiati
e sempri pronti a dari muzzicuna,
quannu fa suli cavudu d'estati,
sunnu comu li tigri e li liuna.
Lu stessu sunnu l'omini sbirsati,
chi sù 'nsignati a fari li latruna,
primu si fannu li beddi scialati
e poi si fannu l'amari vuccuna.
C'innè chi spissu morinu ammazzati,
e inchinu li zubbii e li vadduna,
chiddi chi di li sbirri su' arristati,
quannu vannu 'ngalera è 'na furtuna.
Amici,siddu sbagghiu, mi scusati,
chist'è la virità, 'unn'è canzuna,
lu dicu a tutti chiddi c'attintati
c'è cu la vita si cancia pi miliuna.
Lu dicu a vuci forti apertamenti
sunnu pirsuni malati di menti.
Fontana Antonino
Nessun commento:
Posta un commento