MARIA FAVUZZA
Annea la pasta e nta lu vugghiu abballa.
Trasi lu patri, ciavura lu cottu.
Sciami di picciriddi, risateddi,
palori nichi, lu nasiddu lordu.
Scrusciu di tavuliddi, vanchiteddi,
manuzzi all'aria di cucchiari armati
cadinu nterra comu campaneddi,
poi tornanu a li manu e sunnu spati.
Lu fucularu a bampa spanni cavuru,
accarizia la casa nicaredda,
li tanti cosi, l'occhi, lu littuzzu,
lu Bammineddu nta la vitrinedda.
Lu patri pigghia la nica nta li vrazza.
La matri rattulia lu pignateddu
di sarsa sicca duci accutturata,
a lentu a lentu supra lu furneddu.
Nta lu silenziu chiusu di la sira
pari un cumpressu veru e tuttu novu:
lu lignu chi scattia a lu fucularu,
lu sciusciu di la pasta, di lu broru,
lu scontru di lu piattu e lu cucchiaru,
lu attu chi malia pi lu ristoru.
La mula zappulia forti li peri
mentri li ruppa torna a rusicari.
L'ucchiddu di lu sicchiu attacca ntempu
e l'acqua a stizza a stizza fa sculari.
Lu cani fora abbaia, ratta la porta,
la finistredda joca a trastullari,
li panniceddi sbattinu a la corda
lu ventu fa lu virdi nachiari.
Lu masculiddu cu lu panzuneddu
sciuscia lu scappamentu naturali,
nta ddu cuncertu stona un piriteddu
e attacca na risata ginirali.
La nica s'arruspigghia e fa l'acutu,
lu pettu di la matri la cueta.
Dintra la casa, ridinu li cosi
di sta scena sirena allianati.
Dormi cueta n'orchestra di vita
supra na giostra chi stenta a girari,
ma ama di lu munnu li so petri.
Nessun commento:
Posta un commento