Tribbianu, 'nzolia, griddu o maraschinu,
pistatu cu li peri ntò parmentu,
rivugghi nta la utti e fa lu vinu.
Pi mia la utti è comu un munumentu,
lu ciascu comu un càlici divinu
e lu biccheri ottavu sacramentu.
Jo vivu vinu e doppu mi ni vantu
e cu lu ciascu 'n-manu vivu e cantu:
Lu vinu è zuccaru,
lu vinu è balsamu,
lu vinu è ciauru,
lu vinu è cuscusu,
lu vinu è zagara.
Lu dissi Baccu, puru Gesù:
si vivi vinu 'un mori chiù!
Jò sugnu 'mbriacu, 'mbriacu di stu vinu
chi metti nta lu cori l'alligrìa;
sentu li noti di lu viulinu,
tu si surgenti di la fantasia.
Ti si la varca di lu me destinu,
mmezzu lu mari di la firnicìa.
E quannu sugnu sulu e provu scantu,
vivu lu vinu e doppu scialu e cantu:
Lu vinu è zuccaru,
lu vinu è balsamu,
lu vinu è ciauru,
lu vinu è cuscusu,
lu vinu è zagara.
Lu dissi Baccu, puru Gesù:
si vivi vinu 'un mori chiù!
A postu di la cola vivi vinu
chi fa bon sangu, dici lu dutturi,
lu binidici puru lu parrinu,
lu vivi lu 'gnuranti e 'u prufissuri,
lu vivi l'omu riccu e lu mischinu,
picchì' lu vinu nasci cu suduri.
E a lu viddanu, chi si fa lu vantu,
jò dicu: "Grazie" e ci lu dicu 'n cantu:
Lu vinu è zuccaru,
lu vinu è balsamu,
lu vinu è ciauru,
lu vinu è cuscusu,
lu vinu è zagara.
Lu dissi Baccu, puru Gesù:
si vivi vinu 'un mori chiù!
Dino Altese
Nessun commento:
Posta un commento