Un surciteddu di testa sbintata
avia pigghiatu la via di l'acitu
e facia 'na vita scialacquata
cu l'amiciuna di lu so partitu.
Lu ziu circau tirarlu a bona strata,
ma zappau all'acqua pirchì era attrivitu
e di chiù la saimi avia liccata
di taverni e di zàgati peritu.
Finalmenti Mucidda fici luca,
iddu grida: Ziu!-Ziu! cu dogghia interna;
sò ziu pri lu rammaricu si suca;
poi dici: "Lu to casu mi costerna,
ma ora mi cerchi? chiaccu chi t'affuca!
Scutta pi quannu isti a la taverna!"
Giovanni Meli
Nessun commento:
Posta un commento