LU SURCI CAMURRISTA

Un surci camurrista e murritusu,

sintiti quantu dannu potti fari,

dormiri nun putia e p'un stari uziusu,

facia tutta la notti a rusicari,

Mi misi trenta sacchi fora usu,

ch'un si pottiru mancu arripizzari,

'st'armalu puzzulenti e pirucchiusu,

mi vulia la casa cunsumari,



Facennu a costi d'atru lu sfarzusu,

gran manciati facia senza dinari,

e di li mè buntà, facennu abbusu,

puru li mura cuminciau a sfunnari,

Facennu 'nta n'agnuni un gran pirtusu,

pi di lu 'attu un si fari acchiappari,

però lu attu furbu e maliziusu,

pinsava comu si l'avia a manciari,



Però lu attu chi era cchiù viziusu,

di notti ci piacia scaminari,

d'iri circannu amici era agguriusu,

e li circava pi sulu nun stari.

'Na notti chi lu tempu era friddusu,

pinsau di dintra a dormiri arristari,

si curcau e si misi a runfuliari.



Lu surci camurrista e murritusu,

addiuni nun putia arripusari,

e 'nt'on saccu vardignu e primurusu,

ia circannu cosi di manciari.

Lu 'attu chi durmia c'un occhiu chiusu,

'ntisi lu scrusciu e si misi attintari,

e s'appustau a latu lu pirtusu,

d'unni lu surci si sulia ammucciari.



E' quasi jornu, ddù surci fitusu,

pinsau chi s'avia arritirari,

quannu vitti lu attu cunfusu,

avia fattu la mossa di vutari.

Però lu attu putenti e mafiusu,

l'afferra e unni lu fici cchiuù scappari.

Strincennulu cu l'ugna e li scagghiuna,

vivu si lu manciau 'nta dui uccuna.



Unni l'aiuta sempri la furtuna

a chiddi maliuti e camurrista,

chi vulissiru fari li patruna,

ni cù li cosi soi cu stentu acquista.

Eu lu ricu a li granni e li garzuna,

d'un li fari li contabbanista,

chi Diu unn'è sempri chi pirduna,

a c'unn'av mirudda, nasu e vista.



Veni cu 'na prescia prucissatu,

comu lu surci chi muriu manciatu.

FONTANA ANTONINO