Allatu la nacuzza, Pippinedda
stira cammisi, vesti e falareddi
lu ferru all'impruvvisu ci sfaidda,
fa stiddi d'oru comu fuiareddi.
Ridi lu nicu sulu 'nta la naca,
cu la vuccuzza di latti vagnata.
Lu lettu pari un talamu cunsatu
cu la cutra tissuta 'ncicirata,
li chiumazza pusati lisci lisci,
la sbota bianca tutta arriccamata,
mmezzu li cifri, tra pampini e ciuri.
Spicchia lu cucchiararu, la piattera,
li luma, la campana e lu Bamminu,
tazzi, bucala, cicari, bicchiera,
sutta lu velu di lu tavulinu
vistutu d'una lustra 'nciratina
mannata di l'America luntana.
Vannu li peri lesti pi la casa.
La giarra è china, la pignata vugghi.
La pasta penni longa di la canna .....
eccu chi torna Turi di li Sugghi.
Lu cani abbaia allegru a lu violu.
Curri la spusa 'ncontru a lu maritu.
Lu fucularu fa nà gran vampata.
C'è ciavuru di sarsa e finucchieddu
'ntipatu 'nta li mura di la casa
e amuri granni pi lu nicareddu.
L'Ancilu vigghia supra la nacuzza,
la fidi a lu capizzu l'anninnia.
Lu patri ioca cu lu picciriddu,
ridinu l'occhi ad ogni vasuneddu.
Maria Favuzza
Nessun commento:
Posta un commento