Siddu pirdemu li tradizioni
Sarà pi 'sti palazzi a quattru piani.
Complici sunnu li televisioni,
Chi 'nfruscanu li testi a li cristiani.
Quannu c'eranu casi a piantirrenu,
C'era rispettu e c'era assai cchiù unioni.
Ora c'è sparramenti e picca beni,
E nun si fa discursi sempri boni.
Talìu, a lu mumentu di la Missa,
Quannu si scancia lu " signu di paci".
" Forma" di paci si pò diri chissa:
Picchì ' n"sustanza a fallu ci dispiaci.
Niscennu fora, si dici a l'amicu:
"Chissu cu mia nun ci avi a parrari!
Ti giuru, e cu lu cori ti lu dicu:
Chi guai grossi c'è fari passari".
Cu chistu, cari amici, vogghiu diri:
Li parrini l'avemu attintari.
Lu signu di la paci veni a diri
Chi sciarriatu nuddu ci av'a stari.
Ed odiu 'nta lu cori 'un s'avi a aviri,
Ma essiri palummi senza feli.
Quannu chi genti tinti 'un si nni viri,
Ni gorinu li Santi di li celi.
Rosario Grillo
Nessun commento:
Posta un commento