Lu cani curri appressu a lu patruni,
p'aviri ratu un pizzuddu di pani,
ci tocca puru dormiri a l'addiuni,
fora a lu friddu pi nuttati sani.
Quant'è amara 'sta vita ti nn'adduni,
pi li canuzzi e pi l'essiri umani,
c'è muggheri chi nun sentinu raggiuni,
vulennu robbi novi e scarpi sani.
S'un su di lu maritu accuntintati,
a la sira si curcanu sciarriati.
Nun dicu chi su tutti smiruddati,
li fimmini 'un su tutti a 'na manera,
ci nni sunnu muggheri assistimati,
c'a li mariti soi ci fannu cera.
E quantu 'nta lu lettu su curcati
su rosi e gigghi di la primavera,
mentri ci nn'è, ch'essennu cuntrariati,
sunnu cchiù tinti assai di 'na pantera.
E siddu soccu vonnu nun ci l'hannu,
cu lu maritu 'npaci nun ci stannu.
Mentri chi li cani, chi su armali,
su' sempri agguriusi e gentili,
li cacci, ci cafuddi, ci fai mali,
li chiami e prestu tornanu fidili;
s'un fussi pi l'affettu sessuali,
ci nni fussiru assai cristiani vili,
chi 'nta la testa ci hannu picca sali,
cchiù tinti di pecuri a barili,
chi nun ci vannu s'un sunnu ammuttati,
a via di vuci forti e marruggiati.
Vi ricu ora qual è la differenza,
chi c'è di la muggheri e di lu cani;
lu cani mancia, dormi e nenti pensa
ci abbasta sulu un pizzuddu di pani.
La muggheri pigghiannu cunfirenza,
voli vistita, brillanti e cullani
e, s'un c'è sordi l'accatta a chirenza,
maanciari voli sasizza e banani.
S'un c'è divertimentu e panza china,
'un su' cchiù 'npaci, su' 'nta na ruvina.
FONTANA ANTONINO
Nessun commento:
Posta un commento