A lì me' tempi ch'era nicareddu
e avvicinava lu santu Natali,
armàvamu ogni sira bancareddu
cu li parenti stritti cchiù carnali,
a tummula si jucava e a mazzuneddu;
passavamu lu tempu, beni o mali.
Però l'Amuri pi lu Bammineddu
tann'era un sintimentu naturali.
Na vota, sì, chi eramu cchiù boni.
Nveci ora semu menu cristiani.
Ci sunnu veru assai tintazioni.
Nun c'è rispetti mancu pi li cani.
Ci curpanu li troppi ' nvinzioni,
Di quannu addisiavamu lu pani,
si persiru accussì li tradizioni,
addivintammu peju di pagani.
Dunn'è chi sunnu cchiù ' ddi tempi bendi,
quannu chi l'aria di festa profumava
di mustazzoli, sfinci e cuddureddi?
Quannu chi lu pirsepiu s'apparava,
tutt'addubbatu cu li pastureddi
e poi la ninnaredda si cantava,
accumpagnata cu li ciarameddi,
nuttati 'nteri, 'nfin'a ch'agghiurnava?
St'ebbichi si 'nni jeru 'nta un muccuni.
Ma dintra arresta sempri ' acchi signali.
No pi vuliri fari un parauni:
L'antichi semu cchiù sintimintali
la firi a Diu purtassi a la raggiuni!
Chi l'amuri ristassi sempri tali!
Mmitu a la paci tutti li pirsuni.
Ludamu sempri lu santu Natali.
Pietro Fileccia
Nessun commento:
Posta un commento