Santa vuci di Diu sacra e divina!
Ni chiama a tutti, a toccu di campana,
la santa Missa e la santa duttrina
di la Chiesa cattolica rumana.
Sta Chiesa, 'ntra lu munnu pilligrina,
ni forma tutti a la virtù cristiana.
San Petru fu lu capu custrutturi
pì vuluntà di Cristu redenturi.
Gesù Cristu, chi è nostru Signuri,
a San Petru lu fici 'ncuraggiari.
Iddu ju a Roma, e nun appi timuri,
pi lu santu Vangelu pridicari.
San Petru e Paulu, cu lu so' firvuri,
si ficiru pi Diu martirizzari..
Pi iddi, cu li vuci veru arcani,
sonanu 'n tutti chiesii li campani.
Si cunvirteru a Diu tanti pagani.
Duminanti di stati e nazioni
dettiru libbirtà a li cristiani
di prufissari la so' riliggioni.
Ma tanti, priputenti e sdisumani,
chi 'riritaru la 'ntantazioni,
pi lu duminiu e li sporchi dinari
genti 'nnuccenti fannu assassinari.
Pentiti, piccaturi, e nu tardari,
pentiti e nun ci perdiri cchiù uri!
subbitu e prestu vatti a cunfissari!
pentiti a Diu, cull'attu di duluri!
Diu t'aspetta e ti pò pirdunari.
Dumannacci pietà a Cristu Signuri.
Dumannacci pirdunu chi l'ha uffisu,
si vò la vita eterna 'n paraddisu.
Antonino Battaglia
Nessun commento:
Posta un commento