DICIANNOVE MARZO

Li pisciteddi su’ nta li bicchera

E vannu firriannu su pi l’acqua chiara.

Chiara fu Maria cu un fici arruri,

li Turchi ci la persiru la fidi.

E morsi ‘ncruci lu nostru Signuri

La seggia ‘mparaddisu n’ava a sarvari.

Cu ben affettu  la taliu sta cena

Chi c’esti fattu lu suli e la luna,

c’è fatta la sfera, la lancia e li tri chiova,

c’è fatta nsina la racina.

Li furficicchi sunnu a cantunera,

e sunnu di Maria nostra suvrana.

Guardu lu quadru e taliu sta cena

 e viu quantu stenti ha fattu la patruna.

San Giusippuzzu n’arrenni un tributu

‘ncelu n’a spetta lu celu biatu.

Maria Santa si vota ‘ncummittu

San Giusippuzzu ni facia l’affettu.

Vinni lu jornu di la to santa amata

Picchi tu palli cu ssa lingua sciota,

Maria di San Giuseppi fu onurata

Dintra  ‘nna rutticedda fu arricota.

Lu diciannove di marzu è la jurnata

Ognunu ‘mmita a San Giuseppi e nota,

Nutati piccatura all’atra vita

Passannu gia sta vita travagghiata.

O Patriarca di lu paraddisu

Summu fatturi e patri gluriusu,

specchiu di santità, allegru visu,

patri di tutti nui, patri amurusu.

Patri supremu di bontà e di cori,

arrimuddati li cori cchiu duri,

Patri, li vostri grazii quantu foru!

Facitici allustru dunni fa lu scuru.

Patri chi alluminastivu lu munnu,

vui siti patri di lu verbu eternu;

gluriusu comu a vui ‘un ci nni sunnu,

libiratini di  ‘peni e di li ‘nfernu.

Quantu duttura, principi e regnanti,

conti baruna e puru imperatura,

preanu stu santu di li santi,

chi l’annu elettu poi pi protettori.

Tutti facemu nna festa galanti,

prucissioni e autri complimenti,

‘nta lu misi di marzu  ci nn’è tanti

Chi fannu stu cunvitu a tri nnuccenti.

A San Giuseppi ‘nvitamu cuntenti,

ch’è patri d’amuri filicissimu,

damucci tutti lu cori e lamenti,

chi priassi pi nui l’Onnipontenti.

Quannu è l’ura di muriri,

tutti l’annu allassari li dinari,

i pompi , li spassi e li piaciri,

e la superbia s’avi a carmari.

Nun c’è avvucati ne presidenti,

e mancu dinari ‘nte portafogghi,

mori lu riccu e lu putenti,

tutti l’hannu a lassari stu munnu di ‘mbrogghi.

L’avaru chi dinari sempri cogghi,

cridennusi lu munnu   accattari,

a iddu chi s’avia misu cogghi cogghi

veni l’a morti e ci li fa lassari.

Mentri semu a stu munnu passeggeri,

a San Giuseppi avemu a ‘nvitari.

Cu ‘nvita a San Giuseppe vulinteri,

San Giusippuzzu, l’aviti aiutari.

Tri pirsuni divini e un sulu Diu,

Spiritu Santu a tutti illuminati,

e a la fini di la morti sia

Viva Gesù Giuseppei e Maria.

ANONIMO