Si si susissi, dicu pi miraculu,
lu fanfaruni Don Turi pussidenti,
mortu versu li primi di stu seculu,
( saluti sia a tutti li prisenti )
picciotti, vi giuru chi cripassi
senza diri ne zichiti nè piu.
Li casi di lu feu petra su petra
caderu a pezzi, 'mmezzu a la campagna.
Di mannara, di vecchi, porci e agneddi
resta a vardari sula la muntagna,
disulata di scrusciu di campani.
Lu trappitu, la mola, lu piluni,
la stanga di lu sceccu 'nta la via,
ha persu 'nta lu tempu forza e vita,
e sulu lu ricordu tampasia.
Un pezzu di parmentu pinnulia,
'nta lu cannolu ci ridi lu suli,
lu 'mmernu l'acqua scinni, ucciulia,
la terra vivi, nascinu li ciuri
c'abbrazzanu li spini 'mbriacati.
Dunn'è l'aratu, dunni la cucchitta,
la zappa, li vamperi, la rasola,
la favuci, la liama, la timugna,
lu crivu d'occhiu cu la peddi nova
appisu a lu tripporu 'nta lu suli?
Persa la pala, persu lu rasteddu,
friddu lu furnu sbadigghia scuntentu,
li cianchi aperti, invalidu, malatu,
talia li spini e nun si pò scardari.
MARIA FAVUZZA
Nessun commento:
Posta un commento