La ‘gna Filippa, all’occhiu di lu suli
Situa a la megghiu la so siggitedda.
Lu ghiumazzeddu di stuppa accarizia,
lu spruvulazza cu na’ naticatedda.
S’assetta. Pigghia l’occhiali………
(Un lazzu avi o’ postu di stanghetti)
Lu trasi su misura di la testa
Supra lu fazzulettu a mirriuni.
Lu cannistreddu è chinu di sirvizzu.
Li busi sunnu misi a circulettu,
una è appuntata nta’ lu mazzareddu.
L’attusu adocchia l’agghiommaru tunnu
E cu l’unghidda stravulia lu filu.
Suspira e accumencia la jurnata.
Ticchiti, ticchiti, li busi chiacchiarianu ….
Scinninu punta, agghiuttinu cuttuni.
E gira e cancia busi ogni passata.
A spannu a spannu crisci la quasetta.
Maria Favuzza
Nessun commento:
Posta un commento